jeudi 26 novembre 2009

invern e som e fin e mort.

Invèrn

S' atuda lo solelh ; se mòstra la luna ?

Entre que la Tèrra clinha de l'uèlh.

Ont es l'aucelum que se miran,

Dins una sompa al mes de mai.

Enfugits que son, e oblidós a mai ,

Crenhon que la Tèrra li empega l'arma

Una nívol abraça la cima ponchuda.

Una autra doçament atuda lo jorn.

Una pibol s' alisa als quatre vents .

Lèva al cèl sas brancas escartairadas.

L' ivèrn arriba tal un aucèl de nuèch ,

Un chòt espés , trufaire e desplumat

Per nos coar entre las plumas geladas.

Nos tuariá que la prima lo despèrte pas.

Uèi la Tèrra es a mand de dormir.

Deman veirem una prada de nèu

Un corbatàs artelhar sas virgulas .

De sa vida etèrna , e messorguièra,

Nos dirà de sortir per se lavar .

Ambe de vapor d'alenadas d'amor.

lundi 23 novembre 2009

Catalonha , Catalogne , Catalunya .


Milanta còps mercés a Catalonha.

Mercés a Catalonha de se dire solidari de nosautres los esclafats de la lenga amudida .

Mercés a Catalonha de mostrar qu'un pais pòt butar son enveja de dignitat e de libertat , dusc' al voler caput, de la reconeissença en çò vòstre, de la lenga occitana .

Deman se veiràn las bandièras rojas e jaunas. Mercés a Catalonha.

Mercés a Catalonha, per l'intelligéncia de comprendre que França cerca pas que d' esclafar lo catalan al nòrd, e lo basc al nòrd , per melhor demorar entre « amics » imperials de totjorn , de tota mena.

Mercés de comprendre Catalonha que França ajuda Espanha per mostrar consí se pòt maselar los parladís « pates », catalans, occitans, basc , breton , còrses, alsacians , creòle, valons e neerlandeses .


Mercés milanta còps Catalonha de la vòstra ajuda .


Mercés milanta còps Catalonha d' ajudar de bastir una Euròpa democratica , una Euròpa dels pòbles , fòra los jòcs de las vièlhas nacions imperialas.