vendredi 29 février 2008

Vai -t' en paure c...


La vida es bela. Cadun es liure de far çò que vòl.
Atanben vòli contar çò que m'arribèt al salon de l'agricultura de la pòrta de Versailles.
D'en primièr cal dire consi i soi anat ambe la femna, que volguèt plan de m'acompanhar.
Bon per i anar es simple , qu'aici en França , quand montas dins lo tren , i a pas que dos sens . L'un que va cap a Paris , e l'autre al revers.
A matabiau avem près devers Paris.
Avem trobat un FORMULE1 a posita , a costat de la pòrta d'Orleans , plan coma cal , sala d'aiga e cagador tot en plastica e levat lo bruch del periferic , lo mème que lo de Tolosa (sabem pas se nos an copiat) e ben avem plan dormit .
Al matin coma aviam près la nòstra salcissa e formatge de cap e ben avem pas tastar lo dejunar
previst , que pareissia el tanben en plastica; Estrange qu'avem pas vist degun entre los doas jornadas qu'i passèron. Non que sufis de trapar la carta blu.... E de pagar...
E donc lo jorn famos ont lo president diguèt : vai t-en paura colha .
èri al primièr rang. O vejèri tot. Curios coma las causas s'endevenguèron. Ambe la Françona nous erem sarat per veire los buous , coma se'n vei pas jamai. Unes fotralasses de monstras d'una tòna que nos agachavan pacificament. Quun trepadis paures! Quun molon de monde! qu'es pas de creire. Te nos seguissian ambe los Roergasses , que venian de minjar un costa de vedèl jos la maire . Cal pas i veire de trufardisa, mas sabètz qual se sona lo vedèl jos la maire aici: Manda...
A cada còp qu'o disi la Françona me crida, mas cal sab que lo vedèl jos la maire es una mena de vedèl que sab pas gaire far quicòm tot sol...
E donc coma preniam totis lo camin del rambalh de la dintrada , vaiqui que vesem arribar d'òmes espatluts , que constituavan l'avant garda de securitat de qual savètz. Mas al meteis moment i avia totes los gents de la Sarthe que venian a nòstra recontra per nos far gostar las "rillettes" . O sabètz coma se troba . Om aimi de veire las celebritats mas tanben òm aima de minjar.
Senon cossi se faria a que cada an i ague un million de visitors? I a pas de miracle Bernadetta coma dis lo gendarma a Milhau. Se te pòd emplenar los uèlhs , ambe Miss France , Dona B va plan , mas se pòd t'emplenar tanben la gargamèla es encara melhor...
Donc ambe la Françona trapem cadun un troç de pan e un caloç de rillette. E marchem a la rescontra del president . Mas coma l'issam de personnalitats se sarravan , nos trobèrem près dins un barrejadis que me faguèt tombar lo boçin gras de rillette. E devinètz onte tombèt ? En plen al mitan del tapis roja . Savi pas ço que me prenguèt , encara d'uèi comprèni pas; mas a l'idèa d'amaginar lo president marchar sus mon pastis e alisar sens se mesfisar de ren coma sus una pèl de banana e s'esclafar coma una merda . O belèu en frenissent a l'idèa de perdre una tan bona noiridura. Sabi pas encara d'uèi disi cossi se debanèt... Brèu , me jitèri com'un falord sul tapis roja per trapar mon ben.
Mas lo mescladis d'òmes balèses se sarravan. N'en vejèri d'unes portar la man sus la pòcha revolver... Me tornèt levar . Eran sus ieu.
Me burèron de costat las mans empegadas de grais.
Ièu èri en rabia. Mais que Françoisa gulava qu'avia degut quichar sus lo litron de blanc del val de Leire qu'accompanhava las rilletas. Saviai pas pus cossi far.
L'ausissia s'apròchar e disia : " ièu vòli, ....ièu vòli pas. Ièu vòli que los gals françèses siaguessen los milhors , e que la Tèrra minjèsse coma los Françèses... e defòra los estrangièrs ... E que calia trabalhar pus per batre los quites Chinèses a lor pròpri jòc... Te mostrariai ièu disian los badalucs als chinèses que vendian de nèms ..
Es alara que lo malastre se produsiguèt, lo president me parèt la man:
- bonjorn mossur
- adiu
Parèt encara mai la man e li diguèri :
- pòdi pas, que risca plan de vos salir...
E lo president comprenguèt
- risca pas de vos saludar ,voldriai pas me salir.

Alara se revirèt el qu'aima pas d'èsser al "cuòl de las vacas" e escupiguèt:
-Vai t-en c...
Es la sorna vertat. Que diguèri a radiò "Mon ròdol" mentre que degun escotava pas.
Sul pic Françonèta tornèt al païs pel tren de 8 oras quarante set.
- " te podias pas arrestar un pauc de minjar al luòc de parlar la boca plena e de chucar subretot"
-" mas mon parpalhòlh...
-"la manjiscla i pas pus qu'aquò "
Es per aquò qu'ai vergonha de tonar al païs. Soi lo tipe qu'a insolentat lo president alara que soscava pas son que de salvar lo pastis mèu....

mercredi 27 février 2008

Quau Tusta aqui 1988 Max Allier


Quau tusta aqui.
-Quau tusta aqui qu'en tressauta ma pòrta
quinta brochor me sona dins la nuòch
e cossi vai quand l'esperança es mòrta
qu'un esper baug cofla subran mon còr
degus pecaire i a pas degus per òrtas
sonque lo vent Tots mos amics son cuòchs
Sola en picant sus los cairels la plòja
vèn estelar de regiscles mos uèlhs.

-Soi l'estervel que va cantant la prima
lo baug que trepa descauç sus mo cròs
A cada pòrta tusta e fau la crida
Los òmes d'aut Es vengut lo temps nòu
Tot desborrona a nuòch Fai gaug de viure
Los uòlhs en plors m'esclafisse dau rire
te raube leu un poton a la filha
que dòrm e zo d'un còp d'ala desquilhe
una teulissa e ne coife un talòs

-Tot es morrut Dau vièlh ivern la trèva
jais sus un banc e lo pargue es en dòu
Dins los marcs despolhats pas res ne grelha
qu'una mata de vesc que l'aura mòu
Drech de la fo,t desnuda una peteta
d'aram tragela als plors de son rajòu
Cau èsser asclat mon paure còr per creire
que bòrni jot la rusca un dieu s'esmòu

-E que m'enchaut a ieu quau se charpina
De longa en revolum dins l'espandida
quan vau cantant e brigolant los marcs
de que me fai se morisse de viure
L'amor me ponh e trelime d'aimar
Dins lo trigòs que sos bruchs ensordisson
davale en raissa d'aur dins lo nisau
d'una que se dobris jot mas cotigas
e puòi men torne rire en lo carrau

-Qu'au bufa antau de fantaumas d'amor
a mon còr las qu'a grand dam s'esperfòrça
de batre encara un còp Qu'es de besonh
de m'enganar de bofigas de jòia
ieu mitat mòrt qu'endeven j lo fosc
D'ausir cantar la prima es una escorna
per lo que sap que quand venga lo jorn
grand gaug per tu vent baug Ieu serai bòrni

-Pan ieu soi Pan lo Dieu màger que caup
tot l'univers marimela en sa fauda
Mon còs s'alarga immensi e sus sa fauda
aflòca en lo non -res Fosca clartat
son mieus los uòlhs dau Camin de Sant Jaume
que forniguejan amont Dins lo relarg
de mondes nòus espelisson ont ilhauçan
mila sorelhs Viran ses se laguiar
s'endacòm mai i a quauqu'un que los bada.

.....

Max Allier

dimanche 24 février 2008

Koçovò e UE. Pétròli e cacaoètas.


L'UE ven de reconeisser lo drech dels Kosovars. Coma sem de longa pels dreches dels pòbles de causir lor avenir , desirem als Kosovars une bona astrada.
La question que ven sul pic es de saber per que elses e.... Pas los autres....
Cal dire que que se i a de petròli al Kosovò , l'analisi quequejanta que vòli ensatjar de far ten pas pus. Que tre que se tròba de pétròli , l'America, o la China o los autres grands del monde te meton tot de fuòc e de sang. E levat que lo Bush volguèt d'embestiar l'UE per plaser , per veire lo sèu poder.
Cò que m'interèssa de saber , es per que lo Kosovò e pas los Kurdes , los Ossètes , los Bascs, los Catalans, los Darforèses eca.....................
L'armada turqua contunha sa guèrra dins lo nòrd del Kurdistan ambe la benediccion de Bush. ... que diguèt que los Albanèses constituisson una populacion omogèna?... Vai t'en comprendre !
Per contre pels Palestinians , es pas çò mèsme. Elses i an pas drech.
Praquò son omogènes , los paures, musulmans de religion gaireben totes....
Parei que los USA volon mostrar als rics estats pétrolièrs de l'Arabia que son justes , qualques còps podon èstre per los musumans . Son pas totjorn contra l'Islam. Cal pas se trufar.
La Serbie servira donc a mostrar que los arabis sont pas totjorn sus l'enclutga e los GI del costat del margue..
Mas benlèu m'engani , levat que i a benlèu de pétròli que coma cadun sab , es un cas de fòrça majora.... O alara l'Otan vòl enganar l'Euròpa dins un polid fangas. O savi pas.
De tot biais los Kosòvars tenan una polida astrada.
Las desirem per totis e de pertot.