soi

Soi ta monina , sus l'espatla;

Soi ta flor , sus la parèt,

Ta bandièra de la pèl negra e roja

Que plega las còstas ponchudas .

Soi una nívol grisa que rebala,

Un chòt sens lunetas de solelh;

Un peis que crawla sus l'autò rota.

Loison , soi Loison o Charli.

Bobet o Gaul o Bahamontès.

Un flum de lum electrica,

Un nèrvis de buòu sul cap d'un paure,

Soi una caganha electorala que davala .

De la crèsta del Mont Blanc

Una bestiesa d'ase , de muòl, de caparrut,

Una babaròta amorosa qu'alena sas feromonas

De calossut gispre , de paucval d' arsolha.

Tu me diràs los mots qu'espèri,

A la font mòrta del meu brèç;

Ieu desaurelhat, quèc , gaireben mut e òrb, e garrèl.

Farem de garlandas ambe los tudèls , los budèls , los tunèls ,

N'aurem pas vergonha de parlar francés

Que se parla pas gaire, levat de donar de moneda .

A de monde que parlan pas que l'anglés.

Serem rics coma d'estornèls, braves coma des cocuts que cantan.

Al fond d'un trauc de la prada d'un pibol un pauc PD .

Soi un parpalhòl , puslèu l'ala d'un parpalhòl, o mens encara

L'antena d'un parpalhòl , d'un sautaboc, d'un belugueta, d'una formiga.

La desena dent de la trocha atalentada , de la maissa d'en bas.

La que se petèt d' engolar la ferralha .

Soi lo resson de l'èrba lo ser al fons del bòsc.

Qu'un cagaròl que se caga son amor d'escruma.

Que la mandra venga, que la seuna volontat sià facha.

De la Tèrra dusca l'infèrn dal cèl.

E pas que da mitat.

En trastejant lo cap.

Ane.

Que tot va plan.

Tenes un ventre plan.

E òc , e ieu teni un ventre redond.

De que vòls far? , qu' ara l'òme es prens.