Femnas de totas las colors. S Bec
Femnas de totas las colors de l'autona
Fasètz l'alèta subre li labors di patrias
Avètz de flumes dins las desplegadas de vòstri alas
Desembrutits di radèus medusats de malamanha
Avètz de matriças que vendemian que s'abrandan
Comètas infertas ai desirs di pòbles
Avètz d'escabòts d'ovules pendolats als estèlas
Que semenan de respelidas avenidoiras
Avètz d'onomatopeas de vin pur que petan
Sota la lenga retrobada dis espaimes!
Femnas d'escambarlons volatz sus lo temps
Tèsta saurrada d'aucèus di tropics
Avètz de televisions dins vòstri uèlhs
Siatz nusas ferotjas despacientas d'espatlas
Quand li dròlles fan plantier pèr vos badar
Fadas banharèlas d'armas espurgadas d'ageinolhaments
Jusqu'ai isclas non mencionadas de pòbles nòus
Carrejatz vòstre crotz coma una poma cruscada
Siatz tèndras e testudas pèr armar vòstra libertat!
Siatz una mila siatz lo nombre de memòria
Esconjuratz li pretencions insadolablas
De la guèrra.
Aucun commentaire:
Enregistrer un commentaire