Ròsa d'auras molin di marsliura una femna clavelada
i quatre alas de son desir
anuèch vira sus Marselha
O venceiritz de la mòrt!
Epifania dau mond trafegat de tendrum.
Li lusetas de la carrièra
Se prenon dins si peus e montan dins lo cèu.
Li canavieras delargadas
e reversadas e bachocadas
dau fuòc bombisson mòron au comand
d'aqueu respir de vila e de pòrt e de nuèch
Ciutat de fuòc ren que de fuòc
cremant li carns cremant li èimes
nosautres totis enragam li camins
ribejats de solesa que cavan li regards
di molonadas dins lo ronzàs
de la lutz.
Sau de Berra
vènes plus empastar nòstri bregas
amb la doçor di masts enquitranats de luna
dins la nuèch cracinada de bontat.
Sau de Berra
t'an conchada de lutz matrassada d'usinas.
Sus lo Ponent camins destermats de ciris
en procession vers lo Dieu d'Oli
gleisa enarcada dins li nivols
emmantelada roja i preguièras de flama
Berra coròla estranha au front de ton estanh
Berra ponent de la nuèch tota
sagnosa.
Mai Berra a vist aquela femna
Berra prega son desir.
Calafats
lo perfum sèmpre dau quitran
a mièjanuèch crentos passa sus Riba-Nòva
Li maufantans
que son pas li d'antan an cambiat d'unifòrma
e de pèu- vènon chucar d'aranges
au Lacidon en somiant d'Argeria.
Glèisa mesquina de mon còr
mosqueta di desirs descauç
e nus oasis de Marselha
tre pòrge tres datils d'innocéncia
mossegats de la dolor.
Li lumes
ròsa d'auras molin di fuòcs
escanan li diamants de la Bòna Maire
pèr coronar nòstri desirs d'En Domes
R Lafont
Aucun commentaire:
Enregistrer un commentaire